Volta a escola e volta ao equipo de dinamización da lingua galega.
O día 14 de outubro foi o Día das escritoras e os nenos e nenas do CEIP Os Muiños quixeron celebralo, algúns con debuxos dalgunhas escritoras coñecidas, como Educación Infantil que nos debuxou a María Canosa, outros falando un pouco das dificultades que tiñan as mulleres que querían escribir e outros entrevistaron a coñecidos para falar sobre as escritoras que máis lle gustan...
Neste vídeo podedes ver algúns dos seus traballos.
Se hai algo que aprendemos de Luísa e a relación que hai entre a música e a poesía. Se vos interesa profundizar neste tema, non podedes deixar de ver este documentario da Real Academia Galega.
Tedes aquí un pequeno documental sobre Luísa Villalta, no que falan amigos e compañeiros de traballo. Vemos tamén a Luísa recitando, participando da vida diaria, chea de vida e proxectos. Falan dela os que estiveron moi preto dela.
Se queredes lembrar todo o que ten que ver con Luísa Villalta, nada mellor que esta canción a todo ritmo!
Grazas ao traballo do Seminario Galán, podemos ler de forma resumida a súa biografía; ademais, temos acceso a unha escolma das súas obras na parte final deste dossier.
O curso pasado pasámolo pipa cantando co "karaoke" de Francisco Fernández del Riego. Desta volta, escollendo retallos de distintos poemas de Luísa Villalta, chéganos desde o Recuncho de Tambo unha nova entrega: "Poesía en silencio".
Este mes habemos investigar moito sobre esta muller. Para investigar, non hai nada máis útil que unha lupa, xa que nos axuda a fixar a atención e concentrarnos no máis importante, achegándonos ao que nos interesa de verdade. Aquí queda un titorial para construir a famosa lupa de Luísa Villalta.
Despois de ler algún dos libros que falan da súa vida, seguramente poderás responder a un rápido cuestionario. Canto sabes de Luísa Villalta? Especialmente creado para o alumnado do 3º ciclo.
Como xa saberás, Luísa Villalta naceu na cidade da Coruña. O símbolo máis coñecido da cidade é a Torre de Hércules, que ves aquí embaixo. Premendo nela podes acceder a unha sopa de letras na que atoparás o nome de distintos bairros da cidade.
Esta obra narrativa, dividida en dezaoito breves capítulos, foi publicada no ano 2001, e comeza "no tempo no que había reis en Galiza", avanzando pola historia ata chegar aos nosos días. Trata de ofrecer chaves que abran, e non que pechen, e convídanos a reflexionar sobre o uso que nós mesmos facemos desas chaves ao longo da nosa vida. Queda aquí un fragmento incompleto do seu primeiro capítulo. Serías quen de escoller as palabras correctas para completalo? Preme na ilustración para acceder ao texto agochado.
Luísa Villalta estaba moi interesada en calquera tarefa relacionada coa arte: a música, a poesía, o teatro, a pintura... Pero coñecémola, principalmente pola súa produción literaria. Serías quen de atopar nesta sopa de letras 9 das súas obras? Preme na imaxe para acceder á sopa.
Eduardo Pondal é o poeta considerado "bardo" do pobo galego. Coñecedes a súa vida? Por que é tan importante para Galicia? Imos aprender algo máis sobre a súa figura e a súa obra.
Sempre escollemos un "poeta de cabeceira" para celebrar o noso mes da poesía. Neste curso non podería ser outro que Eduardo Pondal, o "bardo" dos poetas galegos. Ler os seus poemas é descubrir nomes cheos de música, guerreiros e guerreiras valerosos, e un profundo amor pola paisaxe, pola terra e pola historia.
Xa que imos celebrar o aniversario de Rosalía, non nos ven nada mal revisar un dos seus poemas mais famosos ,"Adiós ríos, adiós fontes", nesta ocasión da man dos Bolechas. Se escoitamos atentamente, caeremos na conta de que o que cantan é o comezo da súa primeira obra publicada en galego, "Cantares Gallegos", que determina a celebración do Día das Letras Galegas o 17 de maio.
