SEMANA DO LIBRO

Boa tarde!

Esta semana celebramos a Semana do Libro e unha das actividades que fixemos, en colaboración co equipo de Biblioteca, foi unha exposición de libros en galego. 

Cada estudante debuxou a portada do seu libro favorito en galego e con todas fíxose unha exposición no corredor. 

Sairon títulos repetidos como a banda deseñada "Super Pataca", a colección traducida "Escola de Monstros" ou libros de escritoras galegas con gran acollida entre o alumnado lector como o é Ledicia Costas. 

Que mellor maneira de facer unha recomendación lectora e animalos a ler en galego! 

E, para finalizar, queremos compartir o poema que a autora Eva Mejuto nos fixo chegar ás bibliotecas escolares neste Día do Libro 2026:

Cando lemos
percorremos silandeiras as bambolinas dos soños.
Cando lemos
somos a luz do torreiro que alumea nos teus ollos;
somos unha e somos todas sucando contra a marea.
Cando lemos 
somos a chuvia que lanza o ar e bate a area. 
Cando lemos
prendemos lumes sen chama, arredámonos do frío,
escorrentamos o medo, bebemos sol do resío.
Cando lemos
cruzamos pontes de estrelas tecendo con fío invisible...
porque cando lemos 
todo é posible, 
sobre todo o imposible.
Eva Mejuto. Día do Libro 2026

DÍA DA MULLER

Esta semana no centro, con motivo da celebración do Día da Muller e en relación co PDI deste curso sobre os Obxectivos de Desenvolvemento Sostible, en concreto co ODS Nº 5, Igualdade de Xénero, todo o alumnado estivo investigando sobre mulleres españolas importantes na Historia, que contribuíron ou contribúen co seu traballo a lograr cada un dos 17 Obxectivos. 

 

 

Cada aula fixo a súa ficha informativa sobre unha muller destacada que estivera relacionada cos ODS que cada curso ten asignados e logo colocámolas nunha exposición xunto a biblioteca do centro, para que toda a comunidade educativa a poida visitar.

Visibilizar o papel das mulleres do pasado e do presente do noso país é un aspecto imprescindible para formar unha sociedade máis igualitaria.

DÍA DE ROSALÍA

O pasado luns, día 23, conmemoramos o nacemento da nosa poeta máis internacional: Rosalía de Castro.

As semanas previas xa comezamos a traballar sobre a súa figura dende as aulas xa que o alumnado estivo recollendo ideas para a elaboración dun mural sobre Rosalía no centro. Descubrimos que Rosalía tamén forma parte da historia de Muxía xa que estivo vivindo na nosa vila e foi aquí onde se inspirou para escribir a súa novela "La hija del mar". Recollemos as nosas ideas en formato de texto e imaxes e enviámosllas á ilustradora ceense Laura Suárez, que converteu as nosas ideas neste precioso mural.

Dende aquí queremos darlle as grazas a esta artista local por dar forma ás nosas ideas e plasmalas nesta preciosa obra, que nos recordará que o pobo muxián tamén formou parte da vida e obra de Rosalía.

O propio luns 23 celebrámolo inaugurando unha exposición dos seus poemas no corredor xunto a biblioteca e tamén celebramos un recital de poesía, onde tanto profesorado como alumnado lle rendeu homenaxe co recitado dalgúns dos seus poemas máis coñecidos.

Para rematar a xornada, dende o comedor escolar tamén quixemos homenaxear a Rosalía, polo que grazas ao equipo de cociña puidemos degustar o seu  "Caldo de Gloria", que como diría a poeta "nos soupo que la mar".

 

ENTROIDO

Chegou o tempo de Entroido.

Esta semana estamos seguindo os mandados do Meco, que este ano promulga un Entroido Sostible para un mundo máis sostible.

Se queredes saber máis sobre a orixe desta tradición que se celebra tanto en Galicia como en España e en diferentes partes do mundo pincha AQUÍ.

Investiga sobre o Entroido Galego e verás todo o que descobres.

Logo tedes o xogo do Pasapalabra para poñer a proba todo o que aprendestes. 

A gozar moito destes días de festa e tradición!

DÍA DA CANDELORIA

O pasado luns, día 2, celebramos o día da Candeloria no centro.

Este día simboliza a metade do inverno e a partir desta data van medrando os días e a natureza vaise preparando para recibir a nova estación. De aí que na cultura popular sexa unha data relacionada coa predición do tempo, o que se reflicte en refráns como:

"Cando a Candeloria chora, medio inverno vai fóra, que chore, que deixe de chorar, metade do inverno está por pasar".

"O día da Candelaria, si chora ou venta, inverno entra. E si non venta nin chora, inverno fóra".

Aproveitamos a semana para coñecer vocabulario relacionado coas aves e investigar máis de preto algunhas aves da nosa contorna.

Tamén se repartiron polas aulas casiñas de madeira para colocar nas árbores do noso patio e que lle poidan servir de refuxio aos paxariños para criar porque, como di outro refrán "A partir da candeloria, ningunha ave voa soa". 

Agardamos que o tempo nos permita colocalas nestas semanas e poder observar se nos visita algunha ave esta primavera.

NADAL EN GALEGO

Boas!

Chegamos ao remate do 1º trimestre e agora toca gozar do Nadal con familia e amizades.

Deixamos por aquí algunhas propostas para gozar destas semanas de vacacións en galego:

• Repara no vocabulario de Nadal e pensa que usas o palabra correcta ou o castelanismo.

• Coñece ao noso Papá Noel galego: o Apalpador.

• Proba a ver canto sabes do Nadal Galego co Pasapalabra de Nadal.

• Goza destes días sen cole para ler algún libro en galego ou ver algunha película en galego. Na web do Xabarín tes varias opcións e na plataforma Netflix tamén podedes atopar opcións en galego. 

E lembrade: o Nadal tamén é tempo para facer unha reflexión sobre o ano que remata e pensar nos propósitos para o novo ano. 

Dende o cole cada persoa pediu un desexo para un 2026 máis sostible.

Animámosvos a reflexionar que podedes facer vós para contribuír a que o novo ano sexa máis sostible?

Boas festas e feliz Aninovo, comunidade!

DANZA DAS ESPADAS

O pasado venres, 5 de decembro, puidemos coñecer unha das tradicións de Muxía, da man de Lucía, da Asociación Protectora da Danza das Espadas de Quintáns.

Aprendemos sobre a orixe desta danza tradicional da parroquia de Quintáns, que no comezo só era unha danza bailada por homes pero que se mantivo no tempo grazas ás mulleres que comezaron a participar cando non había remuda xeracional e tamén coñecemos o vestiario necesario para danzar.

E despois da teoría, aprendemos a bailala.  

      

Grazas, Lucía, por ensinarnos esta tradición muxiá. 

Coa túa visita máis dalgún e dalgunha está pensando en participar o vindeiro agosto, así que deixo por aquí a súa rede social para que non vos perdades ningunha novidade:

https://www.instagram.com/danza_espadas_quintans/

Un saúdo!

PALABRA DO ANO EN GALEGO

Boa tarde,

A RAG, a través do Portal da Palabras, acaba de poñer en marcha a votación da Palabra do ano 2025. 

É unha iniciativa anual para "tomar conciencia do valor da lingua e do que designan as palabras que eliximos e creamos".
As palabras finalistas que optan a se converter na Palabra do Ano 2025 son:

Sabes o que significa cada unha? Infórmate do seu significado e para a pensar cal cres que define mellor este ano que remata. 

Logo podedes votar AQUÍ ata o 21 de decembro e compartir con familia e amizades, para que tamén poidan votar.

E, quen sabe... para o próximo ano ata podemos propoñer como Palabra do Ano 2026 unha palabra tan singular de Muxía como é COMAREA.

A VOTAR POLA PALABRA DO ANO!

EXPOSICIÓN DE COGOMELOS

  Esta semana, dentro do mes da ciencia en galego, contamos no centro cunha exposición de cogomelos da asociación AMABUL. Nela puidemos coñecer a importancia ecolóxica e ambiental destes seres vivos, ademais de identificar as súas principais características e as normas básicas para poder apañalos, grazas á guía de Daniel, da Asociación Micolóxica "Pan de Raposo" de Cee.

Podedes ver a exposición de maneira virtual de novo na seguinte ligazón:

https://www.amabul.org/divulgacion-ambiental/wood-wide-web-a-rede-que-da-vida-ao-planeta/

Sigamos aprendendo sobre ciencia en galego!

Deica pronto!

DÍA DE NEIRA VILAS

O pasado luns, día 3 de novembro, celebrouse o día de Neira Vilas. Na data do seu nacemento conmemoramos a un dos escritores máis destacados da nosa literatura, realizando unha exposición da súa obra dende a biblioteca escolar, que lles permitiu ao alumnado achegarse á lectura dalgúns dos seus títulos máis destacados.